執行者還是決策者

有些人買賣股票是執行者, 即是別人叫你買A股你就去買A股, 別人叫你買B股你就買B股, 如果A股B股不升就等, 等到不耐煩, 等到蝕到入肉便沽掉, 或者買埋一堆無用的東西放在家中, 掉又唔捨得, 放又晒地方, 攪到唔知點算好. 決策者就唔同, 他們謀定而後動, 出擊前計劃好, 進退有據, 贏就狠輸就忍. 可惜的是世上只有10%是決策者, 90%都是執行者, 而執行者中又為精明及愚蠢的執行者, 你是哪一類? 正所謂精人出口笨人出手, 精人叫你買這買那, 笨人當然是依指示執行. 跟住贏了一小批, 輸了一大批, 蟹貨一籮籮, 唔知點算好.

一般人的心理是這樣的 :

自言自語, "開市時10元買入x股", 開市了, x股做10元, "等等先", "shit, 升到10.5, 都話一開市就買", "又唔信我(這個我即是佢自己)講, 都話會升架啦", 終於升到唔敢買, 後悔了, 自怨自艾.

自言自語, "開市時10元買入x股", 開市了, x股做10元, "等等先", "shit, 升到10.5, 都話一開市就買", "又唔信我(這個我即是佢自己)講, 都話會升架啦", 終於升到唔敢買, 後悔了, 自怨自艾, 跟住財演或有人推薦, 佢發覺還有水位, 於是飛撲入市, 結果當然是做了蟹.

自言自語, "開市時10元買入x股", 開市了, x股做10元, "等等先", "好彩唔入住, 現在跌到9.5, 睇定d先", 終於隻股收市報9.7. 第二天開市以10.3開出, 佢又後悔了, 因為可以在9.5唔買, 現在升了, 又唔知買唔買好.

10元買了x股, 11元食糊, 但x股好像跟佢作對, 只肯升到10.9, 跟住重跌到10.3, 無理由10.9唔沽, 現在才沽, 等一等, x股又升上10.5, "哪, 好彩唔沽住, 真是升返上", 可惜x股最終跌到9.5, "都話10.3就沽, 賺少少好過現在蝕, 最衰就是你(這個你即是佢自己)"

10元買了x股, 止蝕放在9.2, x股真是跌到9.2, "坐多一會", x股回升到9.5, "好彩無沽", 點知x股又再次跌到9.2, "唉, 隻股都是唔掂, 9.5比返佢(這個佢是指市場)", 誰知x股, 跌穿9, 跌到8.5才定了, "等佢上返9元沽貨算了", 可惜, x股遇到一d消息又或是個市出現利空, x股急跌到7元, 佢個心好驚, 只好倉皇沽股算了. 還有一個版本, 沽了之後, 個市又升了, x股跟升了, 佢又後悔沽早了.

某人話x股可以在10元買入, 目標12, 止蝕8元, 好, 跟, 果然買後升到12元, 某人真是股神呀, "你是我的偶像, 多謝你",

某人話x股可以在10元買入, 目標12, 止蝕8元, 好, 跟, 點知買後跌到9.5, "乜師兄/大師...(隨你選擇), 我聽你講在10元買入x股, 現在它股了, 點算好?", "xyz你, 又話會升到12元, 現在跌到9元, 信你蛇都死, 正瘟神".

以上只是一部份, 還有好多, 一時之間講不了咁多, 你們是否其中一員, 或者你們認識的人中有否這些人呢?

好多人都是買股前好有信心, 買了後升了沾沾自喜, 感覺英明神武, 相反跌了, 馬上後悔, 怨天尤人, 從不檢討自己的問題, 這些人只會在股海中被淹死.

人是主觀的動物, 我們受到別人, 自身的經驗所影響, 好多時沒有獨立思想, 人云亦云, 又或者是清醒, 但為了保存自己, 亦要扮傻, 同流合污. 看看中國的文化大革命就知了, 今日林彪是接班人, 於是萬歲不離口, 明天是叛徒, 於是恨不得食其肉飲其血. 歷史上的例如多的是, 只要看上一本就明白了.

所以我們投資又好, 投機又好, 都要有一個系統, 系統因人而異, 你可以設計一個你認為最適合自己的, 設了, 就跟系統行事, 好處是不受個人或別人的影響, 遠離了噪音. 壞處當然就是如同機械人一樣, 沒有個性啦, 但有一個系統, 你就可以客觀一些去執行買賣.之前已經講過, 有策略好過沒有策略, 沒有計劃地去投資/投機, 輸的機會必定高.

至於點設計系統, 容後再談, 皆因我阿春個肚皮系統發出訊號, 我要去醫吓個五臟廟了.