與友人對話 (一)

10月28日

期指收12446升1298點, 國期收5670升471點, 成交161567及142140張, 總成交660.51億

今天終於迎來久候的反彈, 期指上升1298點, 上升近12%, 現貨更利害, 有成14%進帳, 記住, 這個是反彈, 而不是見低回升, 昨天或之前入了貨, 而有利潤者, 應緊記嚴守止贏位, 否則見財化水, 後悔莫及.

星期日與一位多時不見的朋友飲茶, 他和太太在10年前被迫提早退休, 又不想再打工, 於是, 拿了退休金及手上的儲蓄, 做起全職炒股人, 10年來, 他的成績都不錯, 是否大富大貴就不知, 但至少生活頗寫意, 而且完全是自由身, 喜歡怎樣就怎樣, 現在我就一些關於投資的事, 寫出來, 與大家分享吓.

"婆婆, 您好, 好耐無見, 您好嗎?"

"so far so good啦, John, 體驗生活睇成點?"

"唔錯, 今次去到中國的山區住了一段時間, 感覺真好, 以前沒有想過的, 或是想不通的, 現在都清晰多了."

"........."

"........."

"你是職業炒家, 去了體驗生活都有半年了, 咁, 點有收有?"

"我在4月開始離開香港, 不過, 就對經紀落了order."

"什麼order?"

"就是每個月都沽出期權, 例如, 結算價是18000, 就沽下個月的19000認購, 即是沽高一千點, 期間不理它."

"咁, 你的收入都唔錯, 由4月份開始恆指一路跌, 由23000跌到擒日(上星期五)12500, 即是跌了一萬多點, 嘩, 好過打工. 點解你睇得咁淡?"

"4月份是有虧損, 但由5月開始就有利潤了, 我自己覺得自從3月反彈後回落, 反彈已完, 個市會一浪低於一浪, 所以就膽粗粗去沽認購. 估不到反彈延續到4月, 5月先開始下跌"

"現在跌到咁, 你又點睇?"

"不是入市時."

"哦."

"因為個市仍會反覆, 現在入市, 你有可能撞到個低位, 買了d便宜貨, 但亦有機會, 即時坐艇. 最可怕就是比你博多2,3次都對, 你的戒心就會鬆懈. 第一, 二次, 你博反彈, 博唔到, 你一定好肯止蝕, 但, 你中了2,3次, 第四次才輸, 你就不會止蝕, 跟住就是10%, 20%, 50%咁輸, 個陣時, 你個心就會同自己講, 唔怕啦, 錢又唔聽駛, 擺住先. 但, 好多人唔明白, 你在一蚊買股, 跌到9毫唔止蝕, 跌到8毫時又唔止蝕, 等跌到5毫, 止蝕又變成唔意義了. 這個一定好多人都明, 但有一點, 他們不是全職炒家是不會明的."

"是什麼?"

"就係, 你在9毫止蝕, 即是你有9毫, 等跌到8毫, 甚至5毫時, 等如你可以買入更多你的心水股, 即是你本來只有1000股, 跌到8毫你可以買入1125, 跌到5毫你就有1800股, 等佢將來升返到一元時, 8毫買入的, 就比之前贏多12.5%, 5毫買入的, 比之前贏多80%, 但你唔止蝕, 有機會升返一元, 你都是原地踏步. 我叫這個做且戰且退, 保留實力, 等到跌得七七八八, 你就可以進攻了."

"好似打仗一樣"

"股場即是戰場嘛, 在戰場, 沒有將士你就不能反攻, 在股場, 你沒有銀紙你就不能返本, 何況, 你就算有幾多子彈都好, 都會用完的一日, 當你子彈用完, 個市還是跌, 又如何?, 你只有白白錯失買平貨的機會. 這個是我做了全職後才深深領悟到的."

"你講開全職, 講吓你做了全職炒家後, 同之前有什麼不同, 或者又有什麼發現."

"最不同的是, 之前有一份穩定的收入, 鐵打的飯碗(John之前是公務員, 太太是高級護士, 好像是護士長), 買股輸了錢, 一d都唔覺肉痛, 因為有時間可以等它升回來. 現在就不同, 沒有工作, 每天的生活都是要過, 不容有失, 舉個例子, 現在的生活費要一萬元, 即是你每個交易日都要有600左右的收入才能達到收支平衡, 600以上才有多餘錢儲起來, 所以每個交易都要小心處理, 沒有把握或者看不通, 寧願不入市."

"咁, 你又認為何時才是入市時?"

"現在好難講, 宜家每日成交都有5, 6百億, 即是仍有購買力, 到消耗埋最後一批錢, 成交跌返落2,3百億, 我估計就差不多了. 又或者等到明年的3, 4月份吧, 因為到時會有業績公佈, 而且到了那時, 好多嘢都會明朗一些."

篇幅太長, 明天續. 又, 因我只靠記憶, 打出來的東西, 可能會有些零亂, 請大家原諒