與友人對話 (完)

10月30日

11月期指收14150升1517點, 國期收6673升929點, 成交112668及96322張, 總成交751.16億

今天繼續反彈, 超過10%, 美國減息, 做福全球股市, 成交也見回升, 由低位升到今天已接近30%, 個別股份也升超過30%, 幅度嚇人, 但我相信散戶得益不多, 原因是跌不敢買, 亦基於此, 大市有進一步上升的可能, 不過, 我始終對前景唔樂觀, 所以今天都沽出了部份一些已獲利的短炒貨, 以鎖定利潤, 而留下的, 亦會見機行事.

今天續錄與友人的對話, 他的意見只是代表他個人, 我對他所講亦有保留, 希望大家看之餘, 要好好分析, 不竟他的操作方法與大家不同, 他成功的策略亦不代表你會成功. 都是一句, 量力而為, 好好管制風險, 否則你就要被迫退出市場.

"John, 你的建議太前衛, 唔講嗰d, 你作為一個職業炒家, 哦, 炒家不好聽, 不如就當你照料自己的生意吧."

"其實什麼名稱都唔重要, 反正都一樣, 不過, 我真是當這是我自己的生意來看, 入市資金就是做生意的本金, 入了的股票就是貨物, 所以不論何時, 時好時壞, 我都會保留15%左右的現金."

"比例都唔少, 為什麼?"

"我想的是, 回歸11年, 經歷了幾次事件, 現金是王, 我估計大家都應該明白, 好像現在, 通街平嘢, 好多有信心的人都想買, 不同的是, 他們有心無金, 而且我都話, 現在是當生意來做, 資金不夠會好蝕底."

"咁, 你有沒有借孖展?"

"現在沒有, 上年市旺時有, 不過是在9月前, 尤其是抽新股, 你都知, 贏要贏進, 上年9月前, 個市我認為重是健康, 不過8月奇蹟日之後的升就是瘋狂了. 9月之後, 我沒有再買進但亦無沽, 直到溫家寶話沒有直通車才開始減持, 農曆年前全部沽清, 只淨下中電一隻."

"嘩, 你都睇得好準, 點解你沽得咁乾淨?"

"玩了全職都有成10年, 天天看市, 培養了一種感覺..."

"什麼感覺?"

"好難形容, 總之, 你不是完全落場是不會有的, 這些感覺似曾相識, 好像是00年炒科網股時一樣, 當時又是咁瘋狂, 我個心就開始唔安樂, 但見了8月的奇蹟日出現, 又唔知點, 所以最好就是唔好郁, 睇定d, 後來, 10月創了新高, 但過不了幾日溫家寶就話沒有直通車, 嗰時我第一個反應就是開市後沽貨,

"沽了幾多?"

"喺當時沽了5成, , 跟住陸陸續續沽埋其他."

"你現在有什麼貨在手?"

"只有中電."

"有沒有考慮入市?"

"剛回來不久, 要看返之前的數據, 再研究一吓先作決定."

"你剛剛講, 現在不是入市時, 咁如果是長線投資又如何?"

"要看你所講的長線是什麼意思. 但, 不論長線與否, 都要設立止蝕位, 這個是我多年來最重要的經驗, 之前在證券行看股價, 幾年下來, 有一班人都不見了, 我估計已被市場淘汰了."

"你現在還有落證券行."

"有, 一路都有, 我做全職的不落證券行, 有時會覺得好悶, 而且同經紀及一班人吹吓水, 可以了解市場的情緒."

"你點睇股災或者跌市?"

"其實經歷幾次跌市, 我不是好怕災股或跌市, 如果你相信嗰隻股的話, 它在跌市時平了, 你豈不是可以買多d, 咁什麼可怕? 不過, 一般的人好奇怪, 一隻股由一元升到1.2會有人買, 反為由1元跌到0.8就沒有人買, 其實都是同一隻股, 資產質數又沒有變化, 但d人就是害怕."

"可能受寧買當頭起, 勿買當頭跌的影響."

"咁就死得, 為什麼1.2敢買, 跌到落0.5就不敢買, 這些就是輸錢的原因, 尤其是一個長線投資者, 應該對所買的股份有研究有認識, 觀察一排, 在適當的價錢買入, 然後等待收成. 所以剛剛你講長線, 我有疑問, 就是一d人在高位追貨, 有虧損時又唔肯止蝕, 重同人同己講, 是長線買入、有買貴無買錯, 喱d廢話."

"哈哈, 就是有買貴唔買錯累死人."

"對, PE30倍, 50倍都話唔貴, 有冇攪錯?"

"你沒有買賣時, 用什麼來收入?

"衍生工具, 窩輪、牛熊, 不過用得最多的是期指期權."

"你點睇這些東西."

"作為一個純粹的投資者, 唔應該買賣玩這些東西. 但如你是炒家, 你必須要認識, 它們可以幫你增加收入, 當然用得不好, 會令你輸身家, 不過以我所見, 輸身家者都是博晒命又唔肯認輸嗰d人, 您都有玩期指啦, 又唔見你輸清光?(哈哈) 尤其是期權, 我覺得唔認識期權真是好蝕底."

"衣嗰我贊成. 你覺得在牛市及熊市的投資方法有什麼不同?"

"牛市主要是升, 尤其是牛三及牛五, 不過牛五亦即緊接著熊一, 所以要小心d, 不論是牛三定是熊二都要善用衍生工具, 因為可以令你利潤放大."

"不過這個對一般初哥或穩健投資者好像不太適合, 講返d實際的."

"咁, 在牛市時, 盡量買, 在熊市時, 盡量等."

"講明d."

"就是, 在牛市可以用來買股的錢盡買, 但到了熊市, 就要一等再等, 寧願買貴了, 都不要買錯."

"喂, 你好似好矛盾, 之前又話要保留現在, 又話1.2都買, 0.5又唔敢買, 宜家又話盡買及等, 我有無聽錯?"

"你誤會了. 我是炒家, 同一般散戶不同, 他們不是天天買賣, 他們有一份工作, 買股的錢是積蓄, 在牛市時份工一定無問題, 至少唔會無緣無故被人炒, 所以就可以盡量買, 到了熊市, 要等, 至少等到自己認為份工無問題了, 等到個市穩下來了, 才去買, 可能買貴, 但至少心安. 相反, 你一見個市跌就飛身入去, 贏就好, 輸咗又唔肯止蝕, 一日等佢升, 等得兩等, 份工無咗, 手上資金又買少見少, 到了迫不得已時, 就要蝕賣股份, 有多人都是這樣."

"對, 你咁講, 我就明了. 你覺得等到個市穩下來後, 應該買什麼股比例好?"

"我會選在熊市中跌得比例少的先買, 因為嗰d股通常強勢d."

"多謝你教咗咁多嘢比我."

"你講笑啦. 我都是跟你學嘢."

"好啦好啦, 飲茶"